બનાસકાંઠા જિલ્લામાં હાઇરીસ્ક ગ્રુપમાં આવતા ૬ લાખ વ્યક્તિઓનું જિલ્લાકક્ષાએથી સીધુ મોનીટરીંગ

Published By : B.K.NEWS DAINIK
Published Date : 2020-03-25 11:32:01
Views : 805
Modified Date : 2020-03-25 11:32:01

બનાસકાંઠા જિલ્લામાં વૈશ્વિક મહામારી કોરોના વાયરસના સંક્રમણને અટકાવવા માટે જિલ્લા કલેકટર સંદીપ સાગલેની સુચના અને માર્ગદર્શન અનુસાર આરોગ્ય વિભાગના અધિકારીઓ અને કર્મચારીઓ દ્વારા વ્યાપક કામગીરી કરવામાં આવી રહી છે. મુખ્ય જિલ્લા આરોગ્ય અધિકારી ર્ડા. મનીષ ફેન્સીએ કોરોના વાયરસને અનુલક્ષી જિલ્લામાં કરવામાં આવેલ કામગીરીની માહિતી આપતા જણાવ્યું છે કે, કોરાના વાયરસના સંક્રમણને અટકાવવા બનાસકાંઠા જિલ્લામાં હાઇરીસ્ક ગ્રુપમાં આવતા ૬ લાખ વ્યક્તિઓનું જિલ્લાકક્ષાએથી સીધુ મોનીટરીંગ કરવામાં આવે છે. ૨૪૨૫ આશા, ૧૫૨૮ મલ્ટી પર્પઝ અને ફિમેલ હેલ્થ વર્કર, ૨૫૨ જેટલાં મેડીકલ ઓફિસર ર્ડાકટરો સહિતના સ્ટાફ દ્વારા ઘેર ઘેર ફરીને સઘન સર્વે કરવામાં આવી રહ્યો છે. બનાસકાંઠા જિલ્લામાં બહારથી આવતા પ્રવાસીઓનું સઘન મોનીટરીંગ અને સ્ક્રીનીંગ કરવામાં આવે છે. આજદિન સુધી વિદેશમાંથી આવેલા ૩૭૦ પ્રવાસીઓને ટ્રેક કરવામાં આવ્યા છે. જે પૈકી ૨૨૩ પ્રવાસીઓનું ૧૪ દિવસનું ઓબ્ઝર્વેશન પૂર્ણ થયેલ છે. ૧૪૭ પ્રવાસીઓ અન્ડર ઓબ્ઝર્વેશનમાં છે. મહારાષ્ટ્રંમાંથી ૪૭૪૯ વ્યક્તિઓ બનાસકાંઠા જિલ્લામાં આવ્યા છે. આજદિન સુધી બનાસકાંઠા જિલ્લામાં કોરોના સંક્રમિત એકપણ કેસ પોઝીટીવ નોંધાયો નથી. આઇસોલેશનમાં રાખેલ ૪ શંકાસ્પદ પ્રવાસીઓના રિપોર્ટ પણ નેગેટીવ આવ્યા છે. દિયોદર તાલુકામાં હોમ ક્વોરોન્ટાઇનમાં રહેલ વ્યક્તિ વાઇલેટ કરતા હોઇ તેની સામે ફરીયાદ દાખલ કરી તેને હોમ ક્વોરોન્ટાઇનમાં રહેવાની ફરજ પાડવામાં આવી છે. કોરોના સંક્રમિત દર્દીઓની સારવાર માટે જિલ્લામાં ૧૩૫૫ બેડની સુવિધાવાળા ક્વોરોન્ટાઇનની વ્યવસ્થા ઉપલબ્ધ બનાવાઇ છે. બનાસકાંઠા જિલ્લામાં જાહેરમાં થૂંકનાર વ્યક્તિઓ પાસેથી ગ્રામ્ય વિસ્તારમાં
રૂ. ૧,૩૦,૫૦૦/- અને નગરપાલિકા વિસ્તારમાં
રૂ. ૧,૪૮,૩૦૦/- એમ કુલ
રૂ. ૨,૭૮,૮૦૦ દંડ વસૂલવામાં આવ્યો છે.