માનવતા સાથે છેડતી : વિદ્યાનગરમાં યુવતીએ ભીખ માગનાર પર માનવતા દર્શાવી રૂપિયા આપ્યા, બદલામાં ભિક્ષુકે ભક્ષક બની શારીરિક અડપલાં કર્યાં

Published By : B.K.NEWS DAINIK
Published Date : 2022-07-21 11:47:59
Views : 286
Modified Date : 2022-07-21 11:47:59

આણંદમાં વિદ્યાનગર પોલીસ સ્ટેશનથી માત્ર 500 મીટર દૂર ટ્યૂશનથી ઘરે પરત જઈ રહેલી છાત્રાની ભરબપોરે શખસે છેડતી કરતાં સમગ્ર વિસ્તારમાં ખળભળાટ મચી ગયો હતો. આ બનાવને પગલે શિક્ષણનગરી તરીકે ઓળખાતા આણંદ-વિદ્યાનગરમાં યુવતીઓની સલામતની લઈને અનેક પ્રશ્નો ઊભા થયા છે.

નરાધમ ભિક્ષુકે છેડતી કરતાં યુવતી હેબતાઈ ગઈ
મહત્ત્વની બાબત તો એ છે કે છેડતી કરનારા શખસે યુવતી પાસે ભીખમાં પૈસા માગતાં તેણે પાંચ રૂપિયા આપ્યા હતા. જોકે વધુ પૈસા માગતાં તેણે ન આપતાં નરાધમે યુવતીની છેડતી કરી હતી. તેણે બુમરાણ મચાવતાં આસપાસના સ્થાનિકો દોડી આવ્યા હતા અને તેને મેથીપાક ચખાડી વિદ્યાનગર પોલીસને હવાલે કર્યો હતો.

યુવતીએ પાંચ રૂપિયા તેને આપતાં જ શખસ ઉશ્કેરાઈ ગયો
સમગ્ર બનાવની હકીકત એવી છે કે વિદ્યાનગર રોડ સ્થિત ખાનગી ટ્યૂશન ક્લાસમાંથી બુધવારે બપોરે પોણાબાર વાગ્યાની આસપાસ 18 વર્ષીય છાત્રા પોતાના ઘર તરફ પરત ફરી રહી હતી. એ દરમિયાન તે પગપાળા જઈ રહી હતી ત્યારે એક શખસ નાના છોકરા સાથે તેની પાસે આવ્યો હતો. તેણે યુવતી પાસે ભીખમાં પૈસા માગ્યા હતા. જોકે યુવતીએ પાંચ રૂપિયા તેને આપતાં જ તે ઉશ્કેરાઈ ગયો હતો અને તેને ગમે તેમ અપશબ્દ બોલી આટલા ઓછા પૈસા કેમ આપ્યા, થોડા વધારે પૈસા આપ તેમ કહ્યું હતું.

યુવતીએ પાંચ રૂપિયા તેને આપતાં જ શખસ ઉશ્કેરાઈ ગયો
બીજી તરફ, વિદ્યાર્થિનીએ વધુ પૈસા ન આપી તેને ત્યાંથી જતા રહેવાનું કહેતાં જ શખસ ઉશ્કેરાઈ ગયો હતો અને તેની સાથે શારીરિક અડપલાં કર્યાં હતાં. અચાનક શખસની હરકતથી ભયભીત છાત્રાએ તરત જ બુમરાણ મચાવી હતી, જેને પગલે આજુબાજુમાંથી લોકોનાં ટોળાં ઊમટી પડ્યાં હતાં અને તેમણે શખસ અને તેની સાથેના બાળકને પકડી પાડ્યા હતા. યુવતીએ પોતાની સાથે બનેલી તમામ આપવીતી જણાવતાં જ ટોળાંએ ભિક્ષુકને મેથીપાક ચખાડ્યો હતો.

શખસની અટકાયત કરી કાર્યવાહી કરવામાં આવી
બીજી તરફ, સમગ્ર ઘટનાની જાણ વિદ્યાનગર પોલીસને કરવામાં આ‌વતાં પોલીસ સ્થળ પર પહોંચી ગઈ હતી અને શખસની અટકાયત કરી હતી. તેનું નામ-ઠામ પૂછતાં શખસ મિયાગામ કરજણનો વતની અને હાલમાં તારાપુર ખાતે રહેતો હોવાનું તેમ જ તેનું નામ વિક્રમ અમીન સલાટ હોવાનું જણાવ્યું હતું.

151 હેઠળ ધરપકડ કરાઈ, બાદમાં જામીન પર છુટકારો થયો
વિદ્યાનગરમાં યુવતીની છેડતી કરનાર ભિખારીને મેથીપાક ચખાડ્યા બાદ ટોળાં દ્વારા પોલીસ મથકે લઇ જવામાં આવ્યો હતો. બીજી તરફ, વિદ્યાર્થિની દ્વારા વિદ્યાનગર પોલીસ મથકે છેડતી કરનારા મિયાગામ કરજણના વતની અને હાલ તારાપુર રહેતો શખસ વિક્રમ સલાટ વિરુદ્ધ લેખિતમાં અરજી આપવામાં આવી હતી, જેને પગલે પોલીસ દ્વારા 151 અને 107 કલમ હેઠળ તેની ધરપકડ કરી મોડી સાંજે મામલતદાર સમક્ષ રજૂ કરાયો હતો, જ્યાં તેનો જામીન પર છુટકારો થયો હતો.

કોઈ અણછાજતું વર્તન કરે તો તરત પોલીસ-અભયમને જણાવો
શિક્ષણનગરી એવા વિદ્યાનગરમાં અનેક છોકરીઓ અભ્યાસ અર્થે આવતી હોય છે. અહીં અનેક છોકરીઓ જાહેરમાં બિનધાસ્ત ફરી શકે છે. જોકે આમ છતાંય પોલીસના દિવસ દરમિયાનના પેટ્રોલિંગના અભાવને પગલે અનેક આ પ્રકારની ઘટનાઓ બનતી હોય છે, પરંતુ તે પોલીસ ચોપડે આવતી નથી, પરંતુ જો ક્યાંય પણ કોઈ છાત્રા સાથે છેડતી સહિત અન્ય કોઈ પ્રકારની ઘટના બને તો તેમણે વિદ્યાનગર પોલીસના (02692) 230100 કે પછી 181, અભયમની હેલ્પલાઈનનો સંપર્ક કરવો.

Download Our B K News Today App

Related News

Recent Posts

Environment

Women Special

Tweets by BkNewsToday

Follow Us

About us

Head Office (B.K. News)

Quick Links