ગુજરાતના ત્રણ તાલુકામાં મેઘરાજાની 'સદી' : 100 ઈંચથી વધુ વરસાદ

Published By : B.K.NEWS DAINIK
Published Date : 2019-08-19 12:24:04
Views : 743
Modified Date : 2019-08-19 12:24:04

વાર્ષિક પરીક્ષા હોય કે ક્રિકેટની રમત તેમાં 'સદી'ના માઇલસ્ટોન સુધી પહોંચવાનું દરેકનું લક્ષ્ય હોય છે. જોકે, વરસાદને મામલે પણ ગુજરાતના ત્રણ તાલુકા એવા છે જે આ વખતે 'સદી'ના માઇલસ્ટોન સુધી પહોંચવામાં સફળ રહ્યા છે.ચોમાસાની વર્તમાન સિઝનમાં આ વખતે વઘઇ, કપરાડા, ઉમરપાડામાં ૧૦૦ ઈંચ કરતાં પણ વધારે વરસાદ નોંધાઇ ચૂક્યો છે. જેમાં ડાંગ જિલ્લામાં આવેલા વઘઇમાં સરેરાશ ૧૨૨.૫૧ ઈંચ સાથે સૌથી વધુ વરસાદ પડયો છે. ગુજરાતમાં આ વખતેે ૨૮.૩૯ ઈંચ સાથે મોસમનો સરેરાશ ૮૮.૩૮% વરસાદ પડયો છે. જેની સરખામણીએ ગત વર્ષે ૧૮ ઓગસ્ટ સુધી માત્ર ૨૦.૨૯ ઈંચ સાથે ૬૨.૦૩% વરસાદ પડયો હતો. આ વખતે જિલ્લાની રીતે ડાંગમાં સૌથી વધુ ૯૦.૧૧ ઈંચ સાથે મોસમનો સરેરાશ ૯૭.૮૪% વરસાદ નોંધાયો છે. આ સિવાય વલસાડમાં ૮૬.૭૩, નવસારીમાં ૬૩.૭૪ , સુરતમાં ૫૭.૫૫ ઈંચ વરસાદ પડયો છે. ક્ષેત્ર પ્રમાણે જોવામાં આવે તો દક્ષિણ ગુજરાત, કચ્છમાં મોસમનો સરેરાશ ૧૦૦% કરતાં વધુ વરસાદ પડી ચૂક્યો છે. કચ્છમાં ગત વર્ષે૧૮ ઓગસ્ટ સુધી ૨.૬૭ ઈંચ સાથે મોસમનો સરેરાશ ૧૬.૨૪ ઈંચ વરસાદ પડયો હતો. આમ, કચ્છમાં આ વખતે ગત વર્ષની સરખામણીએ ૨૦ ગણો વરસાદ પડયો છે તેમ કહી શકાય.અમદાવાદ જિલ્લામાં મોસમનો સરેરાશ ૧૮.૭૭ ઈંચ જ્યારે અમદાવાદ શહેરમાં ૨૦.૧૫ ઈંચ વરસાદ નોંધાયો છે. રાજ્યમાં કુલ ૬ તાલુકામાં ૪.૯૬ ઈંચથી ૯.૮૪ ઈંચ, ૮૭ તાલુકામાં ૯.૮૮ ઈંચથી ૧૯.૬૮ ઈંચ, ૧૦૯ તાલુકામાં ૧૯.૭૨થી ૩૯.૩૭ ઈંચ જ્યારે ૪૯ તાલુકામાં ૩૯.૩૭ ઈંચથી વધુ વરસાદ પડયો છે. આ વખતે જૂનમાં ૪.૨૭ ઈંચ, જુલાઇમાં ૮.૭૫ ઈંચ અને ૧૮ ઓગસ્ટ સુધી ૧૫.૩૬ ઈંચ વરસાદ નોંધાઇ ચૂક્યો છે. આમ, ગત વર્ષની સરખામણીએ વરસાદનું પ્રમાણ ખૂબ જ સારું રહ્યું છે.

કયા તાલુકામાં વધારે વરસાદ?

તાલુકો	વરસાદ (ઈંચમાં)	સરેરાશ(%માં)
વઘઇ	૧૨૨.૫૧	૧૨૪.૮૧
કપરાડા	૧૧૭.૦૯	૧૧૦.૩૫
ઉમરપાડા	૧૧૨.૬૭	૧૮૦.૭૫
વાપી	૯૫.૩૯	૧૧૨.૧૨
ાૃધરમપુર	૯૧.૩૭	૯૫.૪૨
માંગરોળ	૯૦.૩૨	૧૭૪.૦૧