ગાંધીનગરમાં સ્ક્રેપના વેપારીનું અપહરણ કરી લુંટ કરનાર ડ્રાઇવર સહિત ત્રણ શખ્સોની ફિલ્મી ઢબે પોલીસે ધરપકડ કરી.

Published By : B.K.NEWS DAINIK
Published Date : 2021-03-07 16:47:44
Views : 267
Modified Date : 2021-03-07 16:47:44

ગાંધીનગરના જીઆઇડીસી વિસ્તારમાં સ્ક્રેપનો ધંધો કરનારા યુવાન વેપારીનું કારમાં અપહરણ કરી 80 હજારની કિંમતની બે તોલા વજનની સોનાની ચેન, રોકડા ચાર હજાર તેમજ એટીએમમાંથી રૂપિયા 25 હજાર લૂંટી ફરાર થઇ જનાર ડ્રાઈવર સહિત તેના બે સાથીદારોને ફિલ્મી ઢબે પીછો કરી સેક્ટર-21 પોલીસે ઝડપી અપહરણ વિથ લૂંટના ગુનાનો ભેદ ઉકેલ્યો છે. અપહરણ સાથે લૂંટનો ગુનો કર્યા બાદ પ્રેમિકા સાથે પ્રેમાલાપ કરવાની ભૂલ ડ્રાઈવર મોઈનને ભારે પડી ગઈ હતી.

ગાંધીનગરના સેક્ટર-29 મસ્તાના ફ્લેટમાં રહેતા મોહમ્મદ ઇમરાન સેક્ટર-28 જીઆઇડીસી પ્લોટ નંબર 300માં રાજ સ્ક્રેપ ટ્રેડર્સ નામે લોખંડના ભંગારનો લે વેચનો ધંધો કરે છે. દોઢેક વર્ષ અગાઉ પિતાની નાદુરસ્ત તબિયતના કારણે કપડવંજ તાલુકાના જમાલપુરના હાલ પેથાપુરમાં રહેતાં મોઈન જમાલ શેખને ડ્રાઇવર તરીકે રાખ્યો હતો. 25 ફેબ્રુઆરીના રોજ બપોરે બારેક વાગ્યાના અરસામાં ડ્રાઇવર સફેદ કલરની કારમાં મોહમ્મદ ઇમરાનનું તેના બે મિત્રો વસીમ અને સમીર સાથે મળીને અપહરણ કર્યુ હતું. જ્યાંથી દહેગામ તરફ જઈ ત્યાંના બજારમાંથી ધોકા અને રસી ખરીદી કારને અવાવરુ જગ્યાએ લઈ ગયા હતા. જ્યાં ત્રણેય અપહરણકારોએ મોહમ્મદ ઇમરાનનાં હાથ-પગ બાંધીને માર માર્યો હતો.

બાદમાં મોહમ્મદ ઇમરાનના ખિસ્સામાંથી ચાર હજાર રોકડા તેમજ 80 હજારની કિંમતની બે તોલાની સોનાની ચેન ઝુંટવી લીધી હતી. તેમજ ઇમરાન પાસેથી મળી આવેલ એટીએમનો પાસવર્ડ પણ ધાક-ધમકી આપીને મેળવી લઈ એટીએમમાંથી 25 હજાર રૂપિયા ઉપાડી લીધા હતા અને ઇમરાનના પરિવારજનો અવારનવાર ફોન કરીને ઇમરાનની પૂછપરછ કરતા હોવાથી દર વખતે ડ્રાઇવર મોઈન અવનવા બહાના બતાવીને ફોન કાપી નાખતો હતો. પરિવારના સભ્યોની અવારનવારની પૂછપરછથી ત્રણેય અપહરણકારો ડરી ગયા હતા અને ઇમરાન ને 200 રૂપિયા આપીને ચિલોડા ખાતે ઉતારી દઇ ત્રણેય જણા કારમાં ફરાર થઈ ગયા હતા.

વેપારી યુવાનનું અપહરણ કર્યા બાદ આરોપી ડ્રાઇવર મોઈન જમાલ શેખ પોતે આચરેલા ગુનાના પ્રાયશ્ચિત માટે અજમેર દરગાહે ગયો હતો અને દરગાહે નમાજ અદા કરી ખુદાની બંદગી કરી હતી. જ્યારે બીજી તરફ સેકટર-21 પોલીસ ઈન્સ્પેક્ટર મનોજ ભરવાડે ત્રણ અલગ અલગ ટીમો તૈયાર કરી હતી. જેમાં એક ટીમ સર્વેલન્સનાં આધારે ડ્રાઇવર મોઈનની પાછળ અજમેર પહોંચી ગઈ હતી. પણ પોલીસ પાછળ હોવાની ગંધ આવી જતાં મોઈન ત્યાંથી પાછો ખાનગી વાહનમાં નાથધ્વારાથી ઉદેપુર થઈ ગુજરાત પરત આવી રહ્યો હતો. જેનાં પગલે મધરાત્રે રાત્રે એક ટીમ દહેગામ ગોઠવાઈ ગયેલી અને ઈન્સ્પેક્ટર મનોજ ભરવાડ સાથેની એક ટીમ ચિંલોંડા વિસ્તારમાં બાજ નજર રાખીને ગોઠવાઈ ગઈ હતી. ત્યારે અજમેર શરીફથી પાછળ લાગેલી ટીમે મોઈન જે ખાનગી વાહનમાં બેઠેલો તેને હીંમતનગર હાઇવે પર કોર્ડન કરીને ફિલ્મી ઢબે ઝડપી લીધો હતો.

અપહરણ અને લુંટ કર્યા બાદ ડ્રાઇવર મોઈન સતત તેની પ્રેમિકા સાથે વાતચીત કરતો હોવાની જાણ હેંડ કોન્સ્ટેબલ મહાવીરસિંહને થઈ ગઈ હતી. જેથી મોઈનનાં અલગ અલગ નંબરો સર્વેલન્સમાં રાખી દેવાયા હતા. ત્યારે ગુનો આચર્યા બાદ પ્રેમિકા સાથે ફોન પરનાં પ્રેમાલાપ કરવાની ભૂલ તેને ભારે પડી ગઈ હતી.

આ અંગે સેકટર-21 પોલીસ ઈન્સ્પેક્ટર મનોજ ભરવાડે જણાવ્યું હતું કે, ડ્રાઇવર મોઈનને ફિલ્મી ઢબે ઝડપી લીધા બાદ તેની વૈજ્ઞાનિક ઢબે પુછતાછ કરવામાં આવી હતી. જેથી તેના બે સાગરિત વસીમમિયા યુસુફમિયા શેખ(રહે. સંજરી પાર્ક, પેથાપુર) તેમજ સોહેલ અમનઉલ્લાહ કુરેશી (રહે. આંબલી ફળી, મોટો મહોલ્લો, દહેગામ)ને પણ ઝડપી લઇ ગુનામાં વપરાયેલી કાર, હથિયારો, સોનાનો દોરો સહિતનો મુદ્દામાલ કબ્જે લઈ અપહરણ સાથે લૂંટનો ગુનો ઉકેલી દેવામાં આવ્યો છે.