ગત વર્ષે કડવા ઘૂંટ પીધા બાદ શ્રમિકો સતર્ક, દિલ્હી-પુણેથી મોટી સંખ્યામાં પ્રવાસી મજૂરોનું વતન તરફ પ્રયાણ.

Published By : B.K.NEWS DAINIK
Published Date : 2021-04-08 12:39:11
Views : 230
Modified Date : 2021-04-08 12:39:11

દેશમાં કોરોના વાયરસની બીજી લહેર ગંભીર કહેર વરસાવી રહી છે. કોરોના મહામારીના એક વર્ષ પૂર્ણ થયા બાદ ગત વર્ષે ઊભી થઈ હતી, તેવી પરિસ્થિતિ ફરીથી સર્જાઈ રહી છે. દેશના વિવિધ વિસ્તારોમાં લોકડાઉનનો ભય પ્રવાસી મજૂરોને સતાવી રહ્યો છે. આવી પરિસ્થિતિમાં દરેક પ્રદેશમાં કોરોનાની ગાઈડલાઈનને વધુ કડક બનાવાઈ રહી છે. જેથી લોકડાઉનના ડરથી મજૂરોએ ફરીથી પોતાના ઘર તરફ પ્રયાણ કરવાનું શરૂ કરી દીધુ છે. દિલ્હી, મુંબઈ, પુણે સહિત અન્ય પ્રદેશોમાંથી લોકો પોતાના વતન તરફ પરત ફરી રહ્યા છે.

સમગ્ર દેશ ફરી એકવાર કોરોના વાયરસના એ જ કપરા કાળમાંથી પસાર થઈ રહ્યો છે, જેનો ગત વર્ષે સમગ્ર જનતાએ સામનો કર્યો હતો. એક બાજુ મોટાભાગના દેશવાસીઓ કોરોનાની ગાઈડલાઈનના લીરેલીરા ઉડાવી રહ્યા છે. તો બીજી બાજુ વાયુવેગે કોરોના સંક્રમિતોના નવા કેસ સામે આવી રહ્યા છે. અત્યારે દેશમાં ચાલી રહેલી વાયરસની બીજી લહેર બાળકો માટે પણ ખતરનાક સાબિત થઈ રહી છે. તેવામાં શહેરની અંદર ફરીથી કેસો પર કાબૂ મેળવવા માટે નાઈટ કર્ફ્યુ અથવા આંશિક લોકડાઉન લાદવામાં આવી રહ્યું છે.

આ કપરા કાળમાં તંત્રના કડકાઈ ભર્યા વલણથી લોકોમાં લોકડાઉનનો ભય ફરી પ્રસરી જવા પામ્યો છે. ગત વર્ષે મજૂરોને પગપાળા પોતાના વતન તરફ જવું પડ્યું હતું. રોજગારી છૂટી જતા તેમના પાસે એક ટંકનું ખાવાના પણ રૂપિયા નહોતા. આ તમામ પરિસ્થિતિના પગલે સાવચેતી દાખવીને મુંબઈ, દિલ્હી, પુણે સહિતના અન્ય વિસ્તારોમાંથી પ્રવાસી મજૂરો મોટી સંખ્યામાં રેલવે સ્ટેશન અથવા ખાનગી બસો થકી પોતાને ગામ પરત ફરી રહ્યા છે.

દિલ્હીના આનંદ વિહાર ટર્મિનલ પર છેલ્લા કેટલાક દિવસોથી પ્રવાસી મજૂરો ઘર તરફ જઈ રહેલા નજરે પડે છે. બિહારથી આવેલા કેટલાક મજૂરોએ કહ્યું હતું કે ગત વર્ષે અમે અહીંયા ફસાઈ ગયા હતા. હવે ફરીથી આવી સ્થિતિ ના સર્જાય તે માટે અમે ઘરે પરત ફરી રહ્યા છીએ. કોરોના સંક્રમણના પગલે દિલ્હી સરકારે પણ કડક વલણ હાથ ધર્યું છે. ત્યાં નાઈટ કર્ફ્યું લાદમાં આવ્યું છે. રાજ્યમાં આના સિવાય પણ ઘણા પ્રતિબંધો લગાવવામાં આવ્યા છે, તેમ છતાં કોરોના સંક્રમણના કેસોમાં સતત વધારો થઈ રહ્યો છે. જેથી લોકોમાં લોકડાઉનનો ડર ફરીથી ઘર કરી ગયો છે.

દિલ્હીથી દૂર મહારાષ્ટ્રના પુણેમાં પણ કઈક આવા જ દૃશ્યો જોવા મળી રહ્યા છે. જ્યાં મોટી સંખ્યામાં પ્રવાસીઓ પોતાના ગામ અથવા શહેર તરફ પરત ફરી રહ્યા છે. પુણેના રેલ્વે સ્ટેશન પર ભારે ભીડ જોવા મળી છે. સ્થાનિત રેલવેના તંત્રએ જણાવ્યું હતું કે અહીંયા કોવિડ પ્રોટોકોલનું કડકાઈથી પાલન કરાઈ રહ્યું છે. મોટી સંખ્યામાં લોકો આવતા હોવા છતાં અહીં સોશિયલ ડિસ્ટન્સ પણ જાળવવામાં આવી રહ્યું છે.

મુંબઈના લોકમાન્ય તિલક ટર્મિનસ સ્ટેશન પર રવિવાર પછી દરરોજ લોકોના ટોળે-ટોળા આવી રહ્યા છે. અહીંયા રિઝર્વેશન વગર કોઈને એન્ટ્રી આપવામાં નથી આવતી. ઉત્તર પ્રદેશના રહેવાસી અને ધારાવીમાં સંવિદા પર હેલ્થ કેર વર્કરના રૂપમાં કાર્ય કરી રહેલા અહેમદ ખાને જણાવ્યું હતું કે, ગત વર્ષે અચાનક લોકડાઉનથી અમને ઘણી મુશ્કેલી પડી હતી, અમે પોલીસના દંડા પણ ખાધા હતા. હવે ફરીથી આ પરિસ્થિતિનું નિર્માણ ન થાય તે માટે અમે અત્યારથી વતન તરફ જઈ રહ્યા છીએ.કોરોનાની પ્રથમ લહેરમાં અચાનક લોકડાઉનની જાહેરાત કરાતા લાખોની સંખ્યામાં શ્રમિકો રોજગાર વગર મહા નગરોમાં કે રાજ્યોમાં ફસાઈ ગયા હતા. ત્યારપછી માર્ગ પર કોવિડ મહામારી વચ્ચે લાખો લોકોની ભીડ પોતાના ગામ જવા માટે નીકળી પડી હતી.