3 કલાક પડેલા ભારે વરસાદને કારણે એરપોર્ટ પરિસરમાં પાણી ભરાતા લોકોને મુશ્કેલી.

Published By : B.K.NEWS DAINIK
Published Date : 2023-07-23 16:48:01
Views : 148
Modified Date : 2023-07-23 16:48:01

અમદાવાદ શહેરમાં ભારે વરસાદના કારણે રસ્તાઓ ધોવાયા હોવાની ઘટના બની છે. શહેરના રસ્તાની સાથે એરપોર્ટના રસ્તા પર પણ વરસાદી અસર જોવા મળી છે. ઈન્ટરનેશનલ એરપોર્ટ પર ડેવલપ થઈ રહેલા પાર્કિંગ એરિયાના રસ્તા પર ખાડા પડ્યા છે. રસ્તા અને ફૂટપાથ બેસી જતા એરપોર્ટ ઓથોરિટી દ્વારા કામ હાથ ધરાયુ છે. બેસી ગયેલા રસ્તાને કોર્ડન કરી વેટ મિસ નાખવામાં આવી છે. તેમજ તે તરફનો પણ રસ્તો અવર જવર માટે બંધ છે. અમદાવાદમાં 3 કલાક પડેલા ભારે વરસાદને કારણે એરપોર્ટ પરિસરમાં પણ પાણી ભરાવાની સમસ્યા સામે આવી હતી. છેલ્લા કેટલાક વર્ષથી એરપોર્ટમાં પાણી ભરાવાની સમસ્યામાં વધારો થયો છે તો હવે એરપોર્ટના રસ્તા પર ખાડા પડવાની પણ ઘટનાઓ સામે આવી છે. ખાડા પડવાના સ્થળે જલ્દી કામ પૂર્ણ કરી મુસાફરોને સુવિધા આપવાનો એરપોર્ટ ઓથોરિટીનો પ્રયાસ છે. તેમજ વરસાદ સમયે વરસાદી પાણી નિકાલ કરવા અને મુસાફરોને મદદરૂપ બનવા એરપોર્ટ દ્વારા કર્મચારીઓને કામે લગવાયા હતા. મહત્વનું છે કે યાત્રીઓને મુશ્કેલી નહીં સર્જાય તે દિશામાં કામગીરી કરવામાં આવી છે.વરસાદ દરમાયન સર્જાયેલી સમસ્યાને લઈ એરપોર્ટ સિક્યુરિટી વિભાગની સરાહનીય કામગીરી પણ સામે આવી હતી. જેમાં ધોધમાર પડેલા વરસાદને કારણે પાણી ભરાયા હતા. જેને કારણે આ વરસાદી માહોલ વચ્ચે કારમાંથી નીકળી ગયેલી નંબર પ્લેટ સિક્યુરિટી વિભાગ એકઠી કરી હતી.એરપોર્ટ પર ભારે વરસાદના કારણે વરસાદી પાણી ભરાતા ગાડીઓમાંથી પાણીના પ્રેશરના કારણે નંબર પ્લેટો ગાડી માંથી નીકળી ગઈ હતી. એરપોર્ટ વિસ્તારમાં અલગ અલગ જગ્યા પરથી દસથી વધારે નંબર પ્લેટો મળી આવતા તેને એકઠી કરાઈ અને એરપોર્ટ પર સરદાર પટેલના સર્કલ પાસે સિક્યુરિટી પાસે નંબર પ્લેટ રખાઈ. નંબર પ્લેટ ભૂલનાર કારચાલક સિક્યુરિટી પાસે જઈને પોતાની નંબર પ્લેટ મેળવી શકે છે. પોતાની નંબર પ્લેટ અગાઉ શહેરમાં કેટલાક અંડર પાસ અને રસ્તા ઉપર આ પ્રકારની ઘટનાઓ સામે આવી ચૂકી છે.