ડીસા તાલુકાના કાંટ ગામના નાના ખેડૂતોની દીકરીઓની મોટી સિધ્ધી

Published By : B.K.NEWS DAINIK
Published Date : 2019-12-13 12:10:52
Views : 425
Modified Date : 2019-12-13 12:10:52

બનાસકાંઠા જિલ્લાના ડીસા તાલુકામાં આવેલા નાનકડા ગામ કાંટના નાના ખેડૂતોની બે દીકરીઓએ મોટી સિધ્ધી હાંસલ કરી છે. આ બંને દીકરીઓએ રાષ્ટ્રીય લેવલે ખો-ખોની
સ્પર્ધામાં ભાગ લઈને સુવર્ણ ચંદ્રક મેળવતા ગામના સરપંચ સહિત ગામના આગેવાનોએ આ બંને હોનહાર દીકરીઓનું સન્માન કર્યુ હતુ.
ડીસા તાલુકામાં આવેલા નાનકડા કાંટ ગામના નાના ખેડૂતોની દીકરીઓ કિંજલ મકવાણા અને પાયલ પઢિયાર. માળી સમાજ અને ઠાકોર સમાજની આ બંને દીકરીઓ નાનપણથી રમત-ગમત પ્રત્યે લગાવ ધરાવે છે અને અત્યારે ડીસા તાલુકાના અજાપુરા ગામમાં આવેલી જી.જી.માળી વિદ્યાસંકુલમાં અભ્યાસ કરે છે. આ દીકરીઓ ભલે નાના પરિવાર અને નાના ગામમાં ઉછરી હોય પરંતુ તેમના ઈરાદા બુલંદ છે. તાજેતરમાં જ ચંદીગઢ ખાતે યોજાયેલી રાષ્ટ્રીય કક્ષાની ખો-ખોની સ્પર્ધામાં ભાગ લઈને ગુજરાતની ટીમમાંથી ઉમદા પ્રદર્શન કર્યુ છે અને આ બંને બાળકીઓને ગોલ્ડ મેડલથી નવાજવામાં આવી છે. આ બંને દીકરીઓએ મેળવેલી સિધ્ધી કોઈ નાની સિધ્ધી નથી. કારણ કે આ બંને દીકરીઓ ડીસા જેવા નાના તાલુકાના નાના ગામની દીકરીઓ છે અને રાષ્ટ્રીય કક્ષાએ મોટા મોટા શહેરોના રમતવીરો ભાગ લેતા હોય છે. આ રમતવીરોને પછાડી આ દીકરીઓએ જે સિધ્ધી હાંસલ કરી છે તે ખરેખર કાબિલે દાદ છે. મીડિયા સાથેની વાતચીતમાં આ દીકરીઓએ જણાવ્યુ હતું કે તેમણે આ સિધ્ધી મળી છે તેના પાછળ ગ્રામજનો અને તેમના કોચનો ખુબ જ સહયોગ હતો. આટલા નાનકડા ગામની આ બાળકીઓએ આટલી મોટી સિધ્ધી હાંસલ કરતા આ ગામના સરપંચ જયંતિજી ઠાકોર દ્વારા બંને દીકરીઓને સન્માનિત કરવામાં આવી હતી.
આ પ્રસંગે ગુજરાત ઠાકોર સમાજના આગેવાન ઓધારજી ઠાકોર સહિત આસપાસના ગામોના લોકો મોટી સંખ્યામાં ઉપસ્થિત રહ્યા હતા. આ બંને હોનહાર દીકરીઓનું સન્માન કર્યુ હતુ અને આ દીકરીઓએ મેળવેલી સિધ્ધી પર ગર્વ વ્યક્ત કર્યો હતો. નાનકડા ગામના બાળકોમાં પણ મોટી શક્તિઓ છુપાયેલી હોય છે અને આ બાળકોને પણ જો યોગ્ય પ્લેટફોર્મ આપવામાં આવે તો તે ન માત્ર રાષ્ટ્રીય કક્ષાએ પરંતુ આંતરરાષ્ટ્રીય કક્ષાએ પોતાનું કૌશલ બતાવીને સમગ્ર ભારતનું નામ રોશન કરી શકે છે.