અમદાવાદની સિવિલ હોસ્પિટલમાં કોરોનાના દર્દીઓ વધતાં 75 ટકા બેડ ભરાઈ ગયા.

Published By : B.K.NEWS DAINIK
Published Date : 2021-04-01 16:03:12
Views : 266
Modified Date : 2021-04-01 16:04:49

અમદાવાદમાં કોરોના બેકાબુ બન્યો છે. છેલ્લા એક સપ્તાહથી રોજ 600થી વધુ કેસ નોંધાઈ રહ્યાં છે. ત્યારે શહેરની સિવિલ હોસ્પિટલમાં હાલ 75 ટકા બેડ ભરાઈ ગયાં છે. હોસ્પિટલમાં હાલ 600 દર્દીઓ સારવાર લઈ રહ્યાં છે. નવા દર્દીઓને કિડની હોસ્પિટલમાં ખસેડવા માટેની તૈયારીઓ હાથ ધરવામાં આવી છે.

મ્યુનિસિપલ કોર્પોરેશનની ચૂંટણી પૂર્ણ થતાં અમદાવાદ શહેરમાં કોરોનાના કેસમાં ઉછાળો આવ્યો છે. શહેરમાં 273 માઇક્રો કન્ટેનમેન્ટ ઝોન અમલી હતાં. ત્યારે શહેરમાં જોધપુર, વેજલપુર, દાણીલીમડા, ઘોડાસર, વટવા, સરદારનગર, વાસણા, રાણીપ, બોડકદેવ, ગોતા, ઓઢવ, નિકોલ, વસ્ત્રાલ અને અમરાઈવાડીસહિતના વિસ્તારોમાં વધુ 25 નવા માઇક્રો કન્ટેનમેન્ટ ઝોન વિસ્તાર ઉમેરાયા છે, જ્યારે વેજલપુર, શાહીબાગ, ઘોડાસર, મણિનગર, ચાંદખેડા, જૂનાવાડજ, સીટીએમ, થલતેજ, ચાંદલોડિયા, નિકોલ અને ગોતાના 17 માઈક્રો કન્ટેનમેન્ટ ઝોનને દૂર કરાયા છે ત્યારે 281 માઇક્રો કન્ટેનમેન્ટ ઝોન અમલી બન્યાં છે.

અમદાવાદ શહેર ફરી ડેથસ્પોટ બનવા તરફ જઈ રહ્યું છે. શહેરમાં કોર્પોરેશનની ચૂંટણી અને ક્રિકેટ મેચને પગલે ઉત્તરોત્તર કેસમાં વધારો નોંધાઈ રહ્યો છે. શહેર અને જિલ્લામાં સતત છઠ્ઠા દિવસે 600થી વધારે કેસ નોંધાયા છે. જ્યારે ગુજરાત યુનિવર્સિટીની પરીક્ષા આપતા સીસી શેઠ કોલેજના 3 વિદ્યાર્થી કોરોના પોઝિટિવ થયા છે. છેલ્લા 24 કલાકમાં શહેર અને જિલ્લામાં 620 નવા કેસ અને 595 દર્દી સાજા થયા છે. જ્યારે અમદાવાદ શહેરમાં 3 દર્દીના મોત થતાં મૃત્યુઆંક 2,358 પર પહોંચ્યો છે.