ઇમર્જન્સી ઉપયોગ માટેનો માર્ગ ખુલ્લો, આજે ડ્રગ કંટ્રોલર દ્વારા પણ મંજૂરી મળવાની આશા.

Published By : B.K.NEWS DAINIK
Published Date : 2021-01-02 11:57:14
Views : 233
Modified Date : 2021-01-02 11:58:14

દેશમાં કોરોનાની રસી (વેક્સિન)ના ઈમર્જન્સી ઉપયોગ કરવાનો માર્ગ ખુલ્લો થઈ ગયો છે. શુક્રવારે કેન્દ્ર સરકારની નિષ્ણાત સમિતિએ ઓક્સફોર્ડ-એસ્ટ્રાઝેનેકાની વેક્સિન કોવિશીલ્ડને ઇમર્જન્સી ઉપયોગ માટે મંજૂરી આપવાની ભલામણ કરી છે. મળતી માહિતી મુજબ, ડ્રગ કંટ્રોલર દ્વારા શનિવારે આ અંગેની અંતિમ મંજૂરી મળી શકે છે. કોવિશીલ્ડના 5 કરોડ ડોઝ તૈયાર છે.એક કે બે દિવસમાં હવાઈમાર્ગે દેશભરનાં પ્રાદેશિક કેન્દ્રોમાં આ વેક્સિનને પહોંચાડવામાં આવશે. કેન્દ્ર સરકારે 6 કે 7 જાન્યુઆરીથી દેશવ્યાપી રસીકરણ અભિયાન શરૂ કરવાની તૈયારી પૂર્ણ કરી દીધી છે. જે એક કરોડ આરોગ્યકર્મચારીઓની યાદી તૈયાર કરીને રાજ્યોએ કેન્દ્રને આપી છે તેમને આ રસી પહેલા આપવામાં આવશે.કોવિશીલ્ડ વેક્સિનને પુણેની સીરમ ઇન્સ્ટિટ્યૂટ ઓફ ઇન્ડિયા (SSI)દ્વારા બનાવવામાં આવી રહી છે. તેણે 6 ડિસેમ્બરના રોજ ભારતમાં વપરાશની પરવાનગી માટે અરજી કરી હતી. આ પહેલાં બ્રિટનમાં ઓક્સફોર્ડ-એસ્ટ્રાઝેનેકા દ્વારા આ વેક્સિનને મંજૂરી મળી ચૂકી છે.

સૌથી પહેલા સરકાર સીરમ ઈન્સ્ટિટ્યૂટ પાસેથી વેક્સિન ખરીદશે. 5 કરોડ વેક્સિનના ડોઝને હિમાચલની સેંટ્રલ ડ્રગ્સ લેબોરેટરીએ મંજૂરી આપી દીધી છે. ત્યાંથી વેક્સિનને પ્રાદેશિક સેન્ટરો પર પહોંચાડવાની જવાબદારી પણ સીરમની રહેશે. ત્યાર બાદ આ વેક્સિન રાજ્યોમાં પહોંચશે, બાદમાં રાજ્ય પોતાના આયોજન દ્વારા રસીકરણ શરૂ કરશે.સૌપ્રથમ, એક કરોડ આરોગ્યકર્મચારીઓને વેક્સિન આપવામાં આવશે. તમામ રાજ્યોએ તેમની યાદી કેન્દ્રને મોકલી છે. ફેબ્રુઆરી સુધીમાં તેમને વેક્સિન અપાઈ જશે. એ પછી પોલીસ, મહાનગરપાલિકાના કર્મચારીઓ, જેવા કે ફ્રન્ટલાઈન કર્મચારીઓને વેક્સિન લગાવવામાં આવશે. તેમની સંખ્યા 2 કરોડની આસપાસ છે. કેન્દ્રએ તેમની યાદીઓ પણ મગાવી છે. તેમને માર્ચ સુધીમાં વેક્સિન લગાવાઈ ચૂકી હશે.

રસીકરણ શરૂ કરતાં પહેલાં 2 જાન્યુયારીએ અંતિમ રિહર્સલ થશે. એમાં વેક્સિન સપ્લાઇ, સ્ટોરેજ અને લોજોસતિકની તૈયારીને ચકાસવામાં આવશે. દરેક રાજ્યનાં બે શહેરનાં ત્રણ-ત્રણ સેન્ટરો પર રિહર્સલ થશે. કેન્દ્રીય આરોગ્યમંત્રી હર્ષવર્ધને શુક્રવારે આ અંગેની તૈયારીઓ બાબતે માહિતી મેળવી હતી.ક્લિનિકલ ટ્રાયલ્સમાં કોવિશીલ્ડ 90% સુધી અસરકારક હોવાનું જણાયું હતું. જોકે માણસોમાં ટ્રાયલ થતાં બ્રિટન અને ભારતમાં જુદાં જુદાં પરિણામો મળ્યાં. હવે કેન્દ્ર સરકારનું માનવું છે કે એ 70% સુધી અસરકારક છે, એટલે કે એ 100માંથી 70 લોકોને કોરોનાથી રક્ષણ પૂરું પાડશે.કોલ્ડ ચેન પર કઈ બેચની કેટલા વેક્સિનના ડોઝ પહોંચ્યા છે એની સંપૂર્ણ માહિતી ઇ-વિન (ઇલેક્ટ્રોનિક વેક્સિન ઇન્ટેલિજન્સ નેટવર્ક) પર રોજ અપડેટ કરવામાં આવશે, આ સાથે સંપૂર્ણ દેખરેખ રાખવામાં આવશે.