ચૂંટણી ફરજમાં જોડાયેલા સૌ કોઈ માટે પ્રેરણાદાયી કિસ્સો

Published By : B.K.NEWS DAINIK
Published Date : 2019-04-19 06:03:58
Views : 527
Modified Date : 2019-04-19 06:05:18

સાબરકાંઠા જિલ્લાના હિંમતનગર ખાતે માહિતી કચેરી ખાતે કાર્યરત મીડિયા મોનીટરીંગ સેલમાં ફરજ બજાવતા હિંમતનગરના શિક્ષક પોપટભાઈ પટેલના આ શબ્દોમાં ચૂંટણી ફરજ પ્રત્યેની નખશીખ નિષ્ઠા ટપકે છે એટલું જ નહી પરંતુ અન્ય સૌ કોઈને પ્રેરણા પણ પુરી પાડે છે. લોકસભા ચૂંટણીના પડઘમ વાગી ચુક્યા છે. મહત્તમ મતદાન થાય તેની સાથે સાથે શાંતિપૂર્ણ વાતાવરણમાં મતદાન સંપન્ન થાય તે માટે જિલ્લા ચૂંટણી અધિકારી અને કલેક્ટર પ્રવિણા ડી.કે. ના માર્ગદર્શન હેઠળ સાબરકાંઠા જિલ્લા ચૂંટણી તંત્ર ખડેપગે કાર્યરત છે. જિલ્લામાં પેઈડ ન્યુઝ તથા અન્ય સમાચારોના મોનીટરીંગ માટે સાબરકાંઠા માહિતી કચેરીમાં મિડીયા સેન્ટર કાર્યરત કરાયું છે. આ મીડિયા સેન્ટરમાં ૨૧ જેટલા શિક્ષકોને “રાઉન્ડ ધ ક્લોક” ફરજ સોંપાઈ છે. ત્રણ શિફટમાં ૭-૭ શિક્ષકો ફરજ બજાવે છે અને સમાચારો પર દેખરેખ રાખે છે. અહીં ફરજ બજાવતા શિક્ષક પોપટભાઈ પટેલ શિક્ષક તરીકે પોશીના તાલુકાના મતરવાડા-૨ પ્રાથમિક શાળામાં ફરજ બજાવે છે. તેમના માતા શાંતાબેનનું તાજેતરમાં અવસાન થયું. આ દુઃખદ ઘટનાથી ભાંગી પડેલા શિક્ષક પોપટભાઈ પટેલે તંત્રને જાણ કરી તરતજ પોતાના વતન પ્રાંતિજ તાલુકાના અંબાવાડા જવા ઉપડયા. મનમાં માતાના અવસાનનો ઘેરો શોક હતો.. સાથે સાથે મનમાં માતા સાથેના સંસ્મરણોનું ઘોડાપુર હતું. બેશક કોઈ પણ વ્યક્તિ માતાના અવસાનના આઘાતને સહન ન જ કરી શકે.. પોપટભાઈ પટેલ પણ એ જ અવસ્થામાંથી પસાર થઈ રહ્યા હતા. પોતાના ગામ પહોંચ્યા અને પરિવારજનોની હાજરીમાં અગ્નિસંસ્કાર સંપન્ન થયા. માતા સ્વ. શાંતાબેનનો પાર્થિવ દેહ પંચમહાભૂતમાં વિલિન થયો અને પોપટભાઈ પટેલના તન-મન પર સવાર એવી ચૂંટણી પ્રત્યેની ફરજ યાદ આવી. પરિવારજનોને મળ્યા ના મળ્યા અને તરતજ પોતાની મીડિયા મોનીટરીંગની ફરજ પર હાજર થઈ ગયા. તેમને પરત આવેલા જોઈને સાથી કર્મચારી એવા શિક્ષકો પણ મુંઝવણમાં પડી ગયા. એક તરફ પોપટભાઈ પટેલ પર આવી પડેલા દુઃખ પ્રત્યે સંવેદના હતી તો બીજી તરફ ચૂંટણી ફરજ પ્રત્યેની તેમની ફરજ નિષ્ઠા પર ગૌરવ પણ હતું. પોપટભાઈ પટેલ તો આવીને માતા સાથેના સંસ્મરણો વાગોળતા વાગોળતા તેમને અગાઉથી સોંપવામાં આવેલી ન્યુઝ ચેનલ સામે ગોઠવાઈ ગયા. અને શરૂ થઈ પાછી સમાચારની સફર . પોપટભાઈ પટેલ કહે છે કે, “ માં, તો કોને વ્હાલી ના હોય...? મેં પણ માતાની આંગળી પકડીને જીવનની અનેક ડગલીઓ માંડી છે...તડકી-છાયડીઓ જોઈ છે. માતાના અવસાન પછી મારા પરિવારજનોને પણ મારી જરૂર હતી. મારા ભાઈઓ- ઈચ્છતા હતા કે હું તેમની સાથે રહું. થોડો સમય વિતાવું તો દુઃખ વહેંચાય. પણ મેં વિચાર્યુ હતું કે મેં મારી માતાને અગ્નિ સંસ્કારનો મારો અધિકાર ભોગવ્યો, પણ હવે સમય હતો મારી ફરજ અદા કરવાનો. અને એટલે જ હું તરતજ મારી ફરજ પર હાજર થઈ ગયો...” એમ તેઓ ઉમેરે છે...એક તરફ કેટલાંક લોકો પોતાની નાની નાની શારીરિક બીમારીઓને આગળ કરી ચૂંટણી ફરજમાંથી મુÂક્ત લેવા જુદાજુદા હથકંડા અપનાવતા હોય છે. ક્યાંક બીમારી, કયાંક સામાજિક કામોની આળ લઈને પણ ચૂંટણી ફરજમાંથી છૂટવા ફાંફા મારતા હોય છે ત્યારે પોપટભાઈ પટેલ માતાના મૃત્યુ પછી તરતજ ફરજ પર હાજર થયા. આ એક અનુકરણીય કિસ્સો છે. સલામ છે આવા ફરજ નિષ્ઠ શિક્ષકને.