ગુજરાતમાં શરૂ થઈ શકે છે ખેડૂત આંદોલન, ટિકેૈતને કંઈપણ થશે તો આદિવાસીઓ રસ્તા પર ઊતરશે.

Published By : B.K.NEWS DAINIK
Published Date : 2021-01-29 13:04:30
Views : 276
Modified Date : 2021-01-29 13:04:30

ખેડૂત આંદોલન કરતા ખેડ઼ૂતનેતા રાકેશ ટિકૈતે ગઈકાલે મીડિયા સમક્ષ રડતાં રડતાં કહ્યું હતું કે જો સરકારે કાયદો પરત ન ખેંચ્યો તો હું આત્મહત્યા કરી લઈશ. તેમના પગલે ગુજરાતમાં આદિવાસી નેતા અને BTPના સર્વેસર્વા છોટુ વસાવા તેમને પડખે આવ્યા છે. તેમણે સોશિયલ મીડિયામાં પોસ્ટ મૂકીને રાકેશ ટિકૈતનું સમર્થન કર્યું છે અને રસ્તા પર ઊતરવાની ચીમકી આપી છે. સરકારને ચેતવણી આપીને વસાવાએ કહ્યું છે કે રાકેશ ટિકૈતને એક નાનીઅમથી ઈજા પણ થઈ છે તો આદિવાસી સમાજ રસ્તા પર ઊતરશે.

કૃષિ કાયદા વિરૂદ્ધ ખેડૂતોનું પ્રદર્શન દિવસે અને દિવસે વધુ આક્રમક બન્યું છે ત્યારે ભારતીય કિસાન યુનિયનના પ્રવક્તા અને ખેડૂત નેતા રાકેશ ટિકૈત ગુરુવારે સાંજે મીડિયા સમક્ષ અશ્રુભરી આંખે તૂટી પડ્યા બાદ આ આંદોલનને વધુ વેગ મળ્યો હોવાનું પણ ચર્ચાઈ રહ્યું છે, ત્યારે અનેક ગામોના ખડૂતો આંદોલનમાં જોડાયા છે. જેમાં ભરૂચના ટ્રાઇબલ વિસ્તાર ઝઘડિયાના ધારાસભ્ય છોટુ વસાવાએ પણ સોશિયલ મિડિયા પર પોસ્ટ કરી ખેડૂત આંદોલનને પોતાનો ખુલ્લો ટેકો જાહેર કર્યો છે. છોટુ વસાવાના પર્સનલ સોશિયલ એકાઉંન્ટ પરથી થયેલી પોસ્ટમાં કહ્યું છે કે, ‘ રાકેશ ને એક નાની અમથી ઈજા પણ પહોંચી તો આદિવાસી સમાજ રસ્તા પર ઉતરી વિરોધ કરશે’ તેમ જણાવી આદિવાસી બાહુબલી નેતાએ ખુલ્લી ચેતવણી આપી છે. વધુમાં તેઓએ એમ પણ જણાવ્યું છે કે, આ આંદોલન ગમે ત્યારે ગુજરાતમાં શરૂ થઇ શકે છે જે માટે સરકાર અને તંત્ર તૈયાર રહે.

દિલ્હીમાં 26 જાન્યુઆરીએ ટ્રેક્ટર રેલી દરમિયાન થયેલી હિંસાના બે દિવસ પછી પ્રશાસને ખેડૂતોને ગાજીપુર બોર્ડરનો વિસ્તાર ખાલી કરવાનું કહ્યું છે. પોલીસની ચેતવણી પછી ધરણાં પર બેઠેલા અનેક ખેડૂતો ત્યાંથી ચાલ્યા ગયા હતા. ગઈકાલે સાંજ સુધી મોટી સંખ્યામાં દિલ્હી અને યુપી પોલીસ ગાજીપુર બોર્ડર પર પહોંચી હતી. પોલીસની આ સખતાઈ પર ભારત કિસાન યુનિયનના નેતા રાકેશ ટિકૈતના આંસુ સરી પડ્યા ગયા. તેમણે રડતાં રડતાં કહ્યું હતું, ખેડૂતો પર અત્યાચાર કરવામાં આવી રહ્યો છે. તેઓને મારવાનું ષડયંત્ર રચાઈ રહ્યું છે. જો સરકારે કાયદો પરત ન ખેંચ્યો તો હું આત્મહત્યા કરી લઈશ. હું આ દેશના ખેડૂતોને બરબાદ નહીં થવા દઉં.'

ટિકૈતે કહ્યું, 'આટલું મોટું ષડયંત્ર થશે તેનો મને ખ્યાલ ન હતો. મેં બધાંની વિરૂદ્ધ જઈને ભાજપને વોટ આપ્યો હતો. મારી પત્નીએ બીજાને મત આપ્યો હતો, પરંતુ મેં ભાજપને વોટ આપ્યો. તેઓને વોટ આપીને મેં ગદ્દારી કરી હતી. આ સરકાર કિસાન બિરાદરીને સમગ્ર દેશમાં બદનામ કરવાનું ષડયંત્ર કરી રહી છે.' આંદોલન સ્થળ પર પાણીની સપ્લાઈ બંધ કરવાના વિરૂદ્ધમાં ટિકૈતે ગાજીપુર બોર્ડર પર જ અનશન શરૂ કરી દીધા છે. તેઓએ કહ્યું, 'હવે હું ગાજીયાબાદનું પાણી નહીં પીવું. જ્યારે ગામમાંથી પાણી આવશે ત્યારે જ પીઈશ.'

હિંસા મામલે ટિકૈત અને જગતારસિંહ બાજવાને નોટિસ આપવા પોલીસ ગુરુવારે બપોરે 12.30 વાગ્યે ગાઝીપુર બોર્ડરે પહોંચ્યા હતા પરંતુ બંને નેતાઓ સામે ન આવ્યા. જે બાદ પોલીસે તેમના ટેન્ટ પર નોટિસ ચીપકાવી દીધી હતી. તો ગાજીપુર બોર્ડ પર વીજળી કાપવાની વાતથી નારાજ ટિકૈતે કહ્યું, 'સરકાર દહેશત ફેલાવવાનું કામ કરે છે. ગામમાં મુશ્કેલી પડી તો કિસાન લોકલ પોલીસ સ્ટેશને જશે. ત્યાં જે પણ થશે, તે માટે સરકાર જવાબદાર હશે.'

કિસાન નેતા રાકેશ ટિકૈતે કહ્યું છે કે, જો સરકાર આ આંદોલન ચાલવા દેવા ન માંગતી હોય તો તેઓ અમારી અહીંથી ધરપકડ કરી શકે છે. રેલી દરમિયાન જે લોકોએ ઉંધા સીધા ટ્રેક્ટર ચલાવ્યા છે, તે લોકો સાથે અમારે કોઈ સંબંધ નથી. હિંસા શબ્દ અમારી ડિક્શનરીમાં હતો પણ નહીં અને આવશે પણ નહીં. લાલકિલ્લામાં જે પણ કઈ થયું તે આંદોલન તોડવાનું કાવતરુ છે. પ્રશાસન બાજી જીતી ગયું. તેમણે અમને જાળમાં ફસાવવાનો પ્રયત્ન કર્યો છે. રાકેશ ટિકૈતે કહ્યું કે, આ વૈચારિક લડાઈ છે. વૈચારિક ક્રાંતિ છે. તે વિચારથી ખતમ થશે, ડંડાથી નહીં.

સમાચાર એવા પણ છે કે લાલ કિલ્લામાં હિંસા કરનારાઓ સામે પોલીસે રાજદ્રોહનો કેસ દાખલ કર્યો છે. આ પહેલાં પોલીસે 20 ખેડૂત નેતાઓને નોટિસ આપી પૂછ્યું હતું કે તમારા વિરૂદ્ધ કેમ કાયદાકીય કાર્યવાહી ન કરવામાં આવે, 3 દિવસમાં આ વાતનો જવાબ આપો. જેમાંથી 6ના નામ હજુ સુધી સામે આવ્યા છે. આ નેતા છે રાકેશ ટિકૈત, યોગેન્દ્ર યાદવ, દર્શન પાલ, બદલેવસિંહ સિરસા, બલબીરસિંહ રાજેવાલ અને જગતારસિંહ બાજવા.