ગુરુવારે બ્રિટિશ PM બોરિસ જૉનસન અમદાવાદમાં કરશે રોડ-શૉ, જાણો સમગ્ર રૂટ અને કેવી છે તૈયારીઓ

Published By : B.K.NEWS DAINIK
Published Date : 2022-04-20 11:43:51
Views : 236
Modified Date : 2022-04-20 11:43:51

ગુજરાત વિધાનસભાની ચૂંટણી ટાણે પીએમ મોદી સહિત અન્ય દેશના વડાપ્રધાન પણ ભારતની મુલાકાતે આવી રહ્યા છે. મોરેશિયસના પીએમ બાદ હવે બ્રિટનના પીએમ બોરિસ જ્હોન્સન ભારતના પ્રવાસે આવી રહ્યા છે. 21 એપ્રિલે બોરિસ જ્હોન્સન આવી રહ્યા છે. તેઓ અમદાવાદથી ભારતના પ્રવાસની શરુઆત કરશે. 21 અને 22 એપ્રિલે બોરિસ જ્હોન્સન ભારતના મહેમાન બન્યા છે. સીએ ભૂપેન્દ્ર પટેલ દ્વારા બોરિસ જ્હોન્સનનું સ્વાગત કરવામાં આવશે..

બોરિસ જ્હોન્સન ગુજરાતમાં આવનારા પ્રથમ બ્રિટિશ પીએમ છે. તેઓના આગમનને લઇને ખાસ રોડ શો યોજાશે. 21મી એપ્રિલે સવારે આઠ વાગે તેઓ અમદાવાદ એરપોર્ટ પર આવશે. ત્યાંથી ગાંધી આશ્રમ સુધી રોડ શો યોજાશે. એરપોર્ટથી તાજ સર્કલ, કેમ્પ હનુમાન, ડફનાળા, સુભાષબ્રિજ થઈ ગાંધીઆશ્રમ પહોંચશે. રોડ શોને લઇને તંત્ર અને પોલીસ કામે લાગી ગયું છે. સમગ્ર રૂટ પર ગુજરાત અને ભારતીય સંસ્કૃતિને ઉજાગર કરતાં કાર્યક્રમ સ્ટેજ પણ બનાવવામાં આવશે.

22 એપ્રિલે દિલ્લીમાં PM મોદી સાથે કરશે બેઠક

મુખ્યમંત્રી ભૂપેન્દ્ર પટેલ દ્વારા બોરિસ જ્હોન્સનનું સ્વાગત કરશે. બોરિસ જ્હોન્સનના કાર્યક્રમ અંગે સત્તાવાર કોઇ શિડ્યુઅલ જાહેર કરવામાં આવ્યુ નથી. પરંતુ સૂત્રો પ્રમાણે મળતી માહિતી મુજબ સાબરમતી આશ્રમની મુલાકાત લેશે ત્યાર બાદ ઉદ્યોગપતિ ગૌતમ અદાણીને મળવા અદાણી ટાઉનશિપ જશે, ત્યાર બાદ તેઓ વડોદરાના હાલોલ ખાતેની જેસીબી પ્લાન્ટની મુલાકાત લેશે. તેઓ વડાપ્રધાન મોદીને 22 એપ્રિલે દિલ્હીમાં જ મળવાના છે. તેમની ગુજરાતમાં માત્ર ગૌતમ અદાણી સાથે જ મુલાકાત ગોઠવાઈ હોવાનું જાણવા મળ્યું છે.

2020થી મુલાકાત ટળતી આવી હતી

મહત્વનું છે કે બોરિસ જ્હોન્સનનો પ્રવાસ 2020થી ટળતો આવ્યો છે. કોરોનાને કારણે મુલાકાત ટળી હતી પરંતુ 2021માં પીએમ મોદી સાથે વર્ચ્યુઅલ શિખર બેઠક કરી હતી. જેમાં 2030 સુધી માટે વ્યૂહાત્મક અને વ્યાપાર સહયોગનો રોડમેપ તૈયાર કરાયો હતો. ભારત બ્રિટનમાં 5300 કરોડ રૂપિયાની રોકાણ સમજૂતી પર સહમતી સાધી ચૂક્યું છે.

નોકરીઓનું સર્જન કરવા બંને દેશો આતુર

બ્રિટનના વડાપ્રધાનની મુલાકાતને લઇને બંને દેશો વચ્ચે વેપાર સહયોગને કારણે મોંઘવારી ઓછી થાય તેવી આશા સેવવામાં આવી રહી છે. તેમજ ગ્રીન ટેક્નોલોજી અને ઉચ્ચ કૌશલ્ય ઘરાવતી નોકરીઓનું સર્જન કરવા માટે બંને દેશો આતુર છે. સાથે જ બ્રિટનમાં 53 હજારથી વધુ ભારતીય વિદ્યાર્થી છે. બ્રિટનની સાથે નોલેજ શેરિંગ પાર્ટનરશિપ આ પ્રવાસનો મહત્ત્વનો એજન્ડા છે.