બોટાદ કેમિકલકાંડમાં AMOS કંપની પર સકંજો, 4 સંચાલકોને પોલીસે મોકલ્યું સમન્સ

Published By : B.K.NEWS DAINIK
Published Date : 2022-08-01 11:41:42
Views : 258
Modified Date : 2022-08-01 11:41:42

હાજીર હો ! બોટાદ કેમિકલકાંડમાં AMOS કંપની પર સકંજો, 4 સંચાલકોને પોલીસે મોકલ્યું સમન્સ

બોટાદના બરવાળા લઠ્ઠાકાંડમાં વધુ 3 દર્દીઓના મૃત્યુ નિપજ્યાં છે. જેના લીધે લઠ્ઠાકાંડનો કુલ મૃત્યુઆંક 46 થઇ ગયો છે. બોટાદમાં 33 અને ધંધુકામાં 13 મળીને કુલ 46 લોકોના મૃત્યુ નિપજ્યાં છે. લઠ્ઠાકાંડમાં 93 દર્દીઓને દાખલ કરવામાં આવ્યા હતા. સારવાર લઈ રહેલા 93માંથી 83 લોકોને ડિસ્ચાર્જ કરવામાં આવ્યા તો બીજી તરફ આ મામલે ગુનાહિતોને સામે પોલીસે સકંજો કસ્યો છે.

બોટાદના બરવાળામાં ઝેરી કેમિકલ કાંડ મામલે AMOS કંપની સામે પોલીસે કાર્યવાહી હાથ ધરી છે. AMOS કંપનીના ચારેય સંચાલકોને પોલીસનું સમન્સ અપાયુ છે. ચારેયને બરવાળા પોલીસ સમક્ષ હાજર થવા સમન્સ અપાયુ છે. પંકજ પટેલ, સમીર પટેલ તથા રજિત ચોક્સી, ચંદુ પટેલને બરવાળા પોલીસ સમક્ષ હાજર થવા આદેશ અપાયો છે.

લઠ્ઠાકાંડમાં AMOS કંપનીનો શું છે રોલ

લઠ્ઠાકાંડનો આરોપી જયેશ કે જે કેમિકલ ચોરીને બુટલેગર સુધી પહોંચાડતો હતો. આ આરોપી જયેશ AMOS કંપનીમાં કામ કરતો હતો. અમદાવાદના પીપળજમાં આ કંપની આવેલી છે. આરોપી જયેશે બુટલેગરને મોકલેલા દારૂના જથ્થામાં કંપનીમાં ઉપલબ્ધ મિથેનોલનો ઉપયોગ કરાતો કે જે એક પ્રકારે ઝેર જ કહી શકાય. આ જથ્થો AMOS ફેક્ટરીમાંથી જ સપ્લાય કરાતો. વળી જાણવા મળ્યુ હતું કે AMOS કંપની AMCના લાયસન્સ રિન્યુ કર્યા વગર ચાલે છે.

AMOS કંપનીમાંથી કેમિકલની કરતો ચોરી

ઉલ્લેખનીય છે કે, અમદાવાદના પીપળજના દેવરાજ ઇન્ડસ્ટ્રીયલ પાર્કમાં આવેલી AMOS કંપનીમાં મેનેજરની નોકરી કરતાં જયેશે ગોડાઉનમાંથી કેમિકલની ચોરી કરી બુટલેગરોને આપી હતી. જે બાદમાં તેમાં પાણીનું મિશ્રણ કરી બુટલેગરો દેશી દારૂ તરીકે વેચાણ કરતાં હતા. જેથી હવે આ લઠ્ઠાકાંડ નહીં પણ કેમિકલ કાંડ હોવાનો ખુલાસો થયો હતો.