અરવલ્લી જિલ્લામાં મેઘરજમાં અર્ધો ઈંચ: મોડાસામાં 7 મિ.મિ વરસાદ

Published By : B.K.NEWS DAINIK
Published Date : 2019-08-26 11:12:15
Views : 453
Modified Date : 2019-08-26 11:12:15

અરબી સમુદ્ર અને મધ્યપ્રદેશ માં સર્જાયેલ અપરએર સાઈકલોનીક સરકયુલેશન સીસ્ટમને લઈ હવામાન વિભાગ દ્વારા જિલ્લામાં હળવાથી ભારે વરસાદની આગાહી કરાઈ હતી. રવિવારની બપોરથી એકાએક જિલ્લાના વાતાવરણમાં બદલાવ આવ્યો હતો.અને જોત જોતામાં તો જિલ્લાના મેઘરજમાં અર્ધો ઈંચ વરસાદ વરસ્યો હતો.દસ દિવસના વિરામ બાદ જિલ્લામાં એકાએક બદલાયેલા વાતાવરણ વચ્ચે ઉભરી આવેલા કાળા ડીબાંગ વાદળો વરસ્યા હતા.બાયડ સીવાય પાંચ તાલુકામાં વરસેલા હળવા વરસાદથી અસહ્ય ઉકળાટ સામે રાહત પ્રસરી હતી. હવામાન વિભાગ દ્વારા 25મી ઓગસ્ટને રવિવારથી ચાર દિવસ દરમ્યાન સમગ્ર ઉત્તર ગુજરાતમાં ભારે થી અતિભારે વરસાદની આગાહી કરાઈ છે.આગાહી વચ્ચે જ રવિવારની બપોરે અરવલ્લી જિલ્લા માં ઉભરાઈ આવેલા કાળા ડીંબાગ વાદળો વરસતા જ સર્વત્ર રાહત પ્રસરી હતી.મેઘ મહેરના ચોથા રાઉન્ડમાં મેઘરજ-15 મીમી,મોડાસા-7 મીમી,ભિલોડા-04 મીમી,ધનસુરા અને માલપુરમાં બે-બે મીમી વરસાદ વરસ્યો હતો.છેલ્લા કેટલાક સમયથી વાતાવરણમાં વધેલા અસહ્ય ઉકળાટ સામે સર્વત્ર હળવા વરસાદ થી રાહત છવાઈ હતી. ઉપરવાસમાં વરસેલા નોંધપાત્ર વરસાદને પગલે જિલ્લાના માઝુમ જળાશયમાં 500 કયુસેક ની આવક નોંધાઈ હતી. આમ દસ દિવસના વિરામ બાદ વરસેલા વરસાદથી ભારે ઉકળાટ સામે ઠંડક પ્રસરી હતી.

શ્રાવણ અનરાધાર ઃ 25 દિવસમાં 13 ઈંચથી વધુ વરસાદ

જિલ્લામાં ચાલુ વર્ષે શ્રાવણ માસના પ્રારંભ સાથે જ જાણે મેઘરાજાએ જમાવટ આદરી હોય એમ છેલ્લા 25 દિવસમાં જ જિલ્લામાં 13 ઈંચ થી વધુ વરસાદ વરસ્યો હતો.ચાલુ વર્ષે ચોમાસાના પ્રારંભના જુન અને જુલાઈ માસમાં 311 મીમી વરસાદ વરસ્યો હતો.જયારે શ્રાવણના 25 દિવસમાં જ 328 મીમી વરસાદ નોંધાયો હતો.આમ ચોમાસાના 45 દિવસમાં વરસેલા વરસાદ કરતા માત્ર 25 દિવસમાં નોંધપાત્ર વરસાદ વરસ્યો હતો.