આગામી ત્રણ દિવસ અમદાવાદમાં યલો એલર્ટ અને રાજકોટમાં ઓરેન્જ એલર્ટ જાહેર કરાયુ, તાપમાન 42 ડિગ્રીએ પહોંચશે.

Published By : B.K.NEWS DAINIK
Published Date : 2021-04-05 17:40:44
Views : 243
Modified Date : 2021-04-05 17:40:44

ગુજરાતમાં કોરોના વાયરસના કેસમાં ભારે વધારો થઈ રહ્યો છે. તેની સાથે ગરમીનું પ્રભુત્વ પણ લોકોને અસર કરી રહ્યું છે. કોરોના સંક્રમણની સાથે ગરમી વધવાથી લોકોમાં વધુ ભય ફેલાયો છે. ત્યારે હવામાન વિભાગે પણ આગામી બે દિવસ અમદાવાદમાં યલો એલર્ટ રહેશે તેવી આગાહી કરી છે. છેલ્લા બે ત્રણ દિવસથી શહેરમાં વહેલી સવારે ઠંડી અને બપોરે હિટવેવનો અનુભવ થઈ રહ્યો છે. તે ઉપરાંત રાજકોટમાં તાપમાનનો પારો 41 ડિગ્રીએ પહોંચતા ઓરેન્જ એલર્ટ જાહેર કરવામાં આવ્યું છે.

શરુઆતના દિવસોમાં જ તાપમાન 30થી 35 ડિગ્રીએ પહોંચી જતાં શિયાળાની વિદાય સાથે જ જાણે એકાએક ગરમી વધી ગઈ હોય તેવો અનુભવ નાગરીકોને થઈ રહ્યો છે.દિવસ દરમિયાન ગરમીનો પારો 40 ડિગ્રીની આસપાસ પહોંચી જતો હોવાથી શહેરીજનોને તેની અસર સવારે 11 વાગ્યાથી વર્તાવા લાગી છે.જો,કે મોટાભાગના નાગરીકો કોરોના અને ગરમીને કારણે શરુઆતમાંજ કામકાજ પતાવીને બપોરના આકરા તાપમાં ઘર બહાર નીકળવાની ટાળી રહ્યાં છે. અલબત્ત દિવસે ભેજનું પ્રમાણ જળવાઈ રહેતુ હોવાથી બપોરે બહાર નિકળતા લોકોનો પરસેવો છુટી જાય છે.

ગુજરાતમાં 8 શહેરમાં 41 ડિગ્રીથી વધુ તાપમાન નોંધાયું છે. સુરેન્દ્રનગરમાં 42.7 ડિગ્રી સાથે સૌથી વધુ ગરમી નોંધાઇ હતી. જ્યારે અમદાવાદમાં વર્તમાન સિઝનમાં પ્રથમવાર પારો 41 ડિગ્રીને પાર જતાં 41.4 ડિગ્રી તાપમાન નોંધાયું હતું. હવામાન વિભાગે જણાવ્યું છે કે, 'ગુજરાતમાં હાલ પશ્ચિમથી ઉત્તરપશ્ચિમ દિશાનો પવન છે. આગામી 3 દિવસ દરમિયાન મહત્તમ તાપમાનમાં વધારે ફેરફાર થવાની સંભાવના નથી. પરંતુ આ પછીના બે દિવસ દરમિયાન તાપમાનમાં ૨-૩ ડિગ્રીનો વધારો થઇ શકે છે.

રાજકોટ સહિત સૌરાષ્ટ્રભરમાં ગરમીનો પારો 40 ડીગ્રીને પાર કરી ગયો છે. રાજકોટ ગરમીનો પારો 41 ડીગ્રીએ પહોંચતા રાજકોટ મહાનગરપાલીકા દ્રારા ઓરેન્જ એલર્ટ જાહેર કરવામાં આવ્યું છે અને આગામી બે દિવસ હિટવેવ રહેવાની હવામાન વિભાગે આગાહી કરી છે. ત્યારે રાજકોટ મહાનગરપાલીકાનાં આરોગ્ય વિભાગ દ્રારા હિટવેવને લઇને ખાસ એક્શન પ્લાન તૈયાર કરવામાં આવ્યો છે.