વાવાઝોડા વચ્ચે પણ બાળકને લઈ ફરજ પર હાજર માતા.

Published By : B.K.NEWS DAINIK
Published Date : 2023-06-13 17:51:20
Views : 139
Modified Date : 2023-06-13 17:51:20

બિપોર જોય વાવાઝોડાને લઈ ગુજરાતનાં તમામ દરિયા કિનારાઓ એલર્ટ કરી દેવામાં આવ્યા છે. જોકે અસરગ્રસ્ત વિસ્તારોમાં રહેતા લોકોનું સ્થળાંતર કરવામાં આવી રહ્યું છે. જે અનુસંધાને દ્વારકામાં પણ બિપોર જોય તાંડવ મચાવી રહ્યો છે. ભડકેશ્વર મહાદેવ મંદિર પરિસરની દિવાલનો એક ભાગ ધરાશાયી થયો છે.આ સાથે દરિયામાં તેજ પવન અને કરંટ જોવા મળી રહ્યો છે. આ તમામ પરિસ્થિતિ વચ્ચે દ્વારકામાં કાંઠા વિસ્તારમાં આવેલ માનવ વસ્તીને વાવાઝોડાને કારણે કોઈ નુકશાન નહીં થાય તે માટે સ્થળાંતર કરવામાં આવ્યું છે. જેમાં તંત્ર ગ્રામ જનોની સેવામાં લાગ્યું છે. આ વચ્ચે દરેક પરિસ્થિતિમાં ફરજના ભાગ રૂપે સેવામાં હાજર રહેનારા શિક્ષિકાની કામગીરી આંખે ઉભરીને આવી છે.દ્વારકાના દરિયા કિનારાના અસરગ્રસ્ત વિસ્તારો માથી કેટલાય પરિવારોનું સ્થળાંતર કરવામાં આવ્યું છે. જેમને જરૂરી સેવા પૂરી પડી રહે તે માટે શિક્ષકો ફરજ નિભાવી રહ્યા છે. આ વચ્ચે દ્વારકાની રૂપેણબંદર પ્રાયમરી શાળામાં લોકોનું સ્થળાંતર કરવામાં આવ્યું છે. જેમાં એક શિક્ષક પોતાના નાના બાળકને લઈ ફરજ હાજર હતા. મહત્વનુ છે કે આ દરમ્યાન કેન્દ્રીય મંત્રી પુરુષોત્તમ રૂપાલા સ્થળ નિરીક્ષણ માટે દ્વારકાની રૂપેણ બંદર શાળામાં પહોંચ્યા હતા. જ્યાં શિક્ષિકા પ્રજ્ઞાબેન પટેલ પોતાના નાના બાળકને લઈ ફરજ પર હાજર જોઈ રૂપાલાએ તેમની કામગીરીને વખાણી હતી.પુરુષોત્તમ રૂપાલાએ શિક્ષિકાને પૂછ્યું “બાળક સાથે ફરજ પર આવ્યા છો?” આ દરમ્યાન શિક્ષિકાએ હા કહેતા રૂપાલાએ શિક્ષિકાના વખાણ કરતાં સૌને કહ્યું કે, જુઓ સૌથી કપરી પરિસ્થિતિમાં પણ આ મહિલા બાળકને લઈ ફરજ પર હાજર છે, આ વાત સૌ કોઈ એ ગ્રહણ કરવા જેવી છે.બિપરજોય વાવાઝોડાને પગલે દેવભૂમિ દ્વારકામાં સ્થળાંતરની કામગીરી કરવામાં આવી છે. તંત્ર દ્વારા સિગ્નેચર બીચ, રૂપેણ બંદર સહિત દરિયાકાંઠાના 12 ગામોમાંથી 3000થી વધુ લોકોનું સ્થળાંતર કરવામાં આવ્યું છે. સિગ્નેચર બીચ પર કામ કરતા લોકોનું ઓખામાં તો રૂપેણ બંદરના લોકોનું કુરંગામાં સ્થળાંતર કરવામાં આવ્યું છે. તેમજ દરિયાકાંઠા વિસ્તારના તમામ લોકોને સલામત સ્થળે ખસેડવામાં આવ્યા છે.વાવાઝોડા દરમિયાન આકસ્મિક સ્થિતિને પહોંચી વળવા માટે NDRFની એક ટીમ રૂપેણ બંદર પર તૈનાત છે. ત્યારે બીજી ટીમ પણ પહોંચી રહી છે. આ ઉપરાંત SDRFની એક ટીમ પણ તૈનાત છે. તો ઓખાની NDRFની એક ટીમને સ્ટેન્ડબાય રાખવામાં આવી છે. દ્વારકાના દરિયામાં મોજાની તીવ્રતા વધી છે. ગોમતી ઘાટ અને સંગમ ઘાટ પર 15થી 20 ફુટ ઊંચા મોઝા ઉછળી રહ્યા છે. ભરતીના સમયે દરિયો વધુ તોફાની બની જાય છે જેના કારણે મોજાની તીવ્રતા વધી છે.