અમદાવાદમાં હાઇકોર્ટના નિવૃત્ત જજનો પુત્ર હોવાનું કહી દવા લેવાના બહાને વૃદ્ધ સાથે રૂ. 35000ની છેતરપિંડી.

Published By : B.K.NEWS DAINIK
Published Date : 2021-01-28 11:43:41
Views : 257
Modified Date : 2021-01-28 11:43:41

શહેરમાં વૃદ્ધ સાથે છેતરપિંડીના બનાવો બનતા હોય છે ત્યારે જમાલપુરના વૃદ્ધ રિક્ષાચાલકને અજાણ્યાં શખસે હાઇકોર્ટના નિવૃત્ત જજનો પુત્ર હોવાનું કહી રૂ.35000 પડાવી લીધા હતા. એલજી હોસ્પિટલમાં દવા લેવા પૈસા ખૂટે છે તેમ કહી પહેલા 5000 અને બાદમાં ATMમાંથી ટુકડે ટુકડે 30,000 કાઢી લઈ લીધા હતા. મણિનગર પોલીસે ગુનો નોંધી તપાસ શરૂ કરી છે.

જમાલપુરના ગોળલીમડા પાસે સાગર ટાવરમાં ફારૂક નજીરમોહમદ છીપા (ઉ.વ.63) રીક્ષા ચલાવી પરિવારનું ગુજરાન ચલાવે છે. 12 નવેમ્બર 2020ના રોજ ફારૂકચાચા ગુજરાત કોલેજ બ્રિજ નીચે બેઠા હતા. તે સમયે બાઈક લઈ યુવક આવ્યો હતો. આ યુવકે હું દૂધ લઈ પરત આવું પછી તમને ફોન કરું એટલે સોસાયટી પાસે આવી જજો. મારે મણિનગર થઈ ગોતા જવાનું છે. ફારૂકચાચાને બોલાવતા તેઓ ત્યાં ગયા હતાં. યુવકને બેસાડી રીક્ષા મણિનગર રેલ્વે સ્ટેશન તરફ લીધી હતી. રીક્ષા ઉભી રાખવી યુવકે હું દવા લઈને આવું છું, પૈસા ખૂટે તો આપજો હું તમને આપી દઈશ. કોમ્પ્લેક્સમાંથી યુવકે પરત આવી એલજી હોસ્પિટલ જવું પડશે તેમ કહ્યું હતું.

એલજી હોસ્પિટલ પહોંચતા યુવકે મારે દવામાં પૈસા ખૂટે છે તમારી જોડે કેટલા પડ્યા છે. ફારૂકભાઈએ રૂ.5 હજાર પડ્યાનું જણાવ્યું હતું. યુવકે કહ્યું, ચાચા હું તેવો માણસ નથી, નિવૃત્ત હાઇકોર્ટ જજ બારોટ સાહેબનો પુત્ર છું. બાદમાં યુવકે ફોન લગાવી લો મારા પિતા જોડે વાત કરો તેમ જણાવ્યું હતું. ફારૂકભાઈએ ફોન પર વાત કરતા વ્યક્તિએ હું નિવૃત્ત હાઇકોર્ટ જજ બારોટ સાહેબ છું. મારા પુત્રને પૈસા ખૂટે તો આપજો તમે ઘરે તેણે મુકવા આવશો ત્યારે તમને પૈસા આપી દઈશ.

યુવક રૂ. 5000 હજાર રોકડ લઈ ગયો બાદ પરત આવ્યો અને બોલ્યો હજુ પૈસા ખૂટે છે, તમારી પાસે બીજા પૈસા છે. ફારૂકચાચાએ ના પાડતા યુવકએ તમારી જોડે એટીએમ હોય તો આપો જેટલા પૈસાની જરૂર હશે તે ઉપાડી તમને પરત કરી દઈશ. બાદમાં યુવક એટીએમ અને પીન નંબર લઈને ગયો હતો. ફારૂકભાઈના મોબાઈલ નંબર પર થોડીવાર બાદ ટુકડે ટુકડે રૂ.30 હજાર ઉપડયાના મેસેજ આવ્યા પણ યુવક ઘણા સમય સુધી પરત આવ્યો ન હતો. આથી ફારૂકભાઈએ એલજી હોસ્પિટલ સ્ટોરમાં આસપાસ તપાસ કરી પણ યુવક મળ્યો ન હોવાથી પોતાની સાથે છેતરપિંડી થઈ હોવાની જાણ થઈ હતી. મણિનગર પોલીસે અઢી મહિના બાદ આરોપી વિરૂધ્ધ ગુનો નોંધી તપાસ હાથ ધરી છે.