મારુતિ, ટાટા મોટર્સ, મહિન્દ્રા સહિતની કંપનીઓનું જાન્યુઆરીમાં વેચાણ વધ્યું

Published By : B.K.NEWS DAINIK
Published Date : 2026-02-03 14:52:42
Views : 37
Modified Date : 2026-02-03 14:52:42

મારુતિ સુઝુકી, ટાટા મોટર્સ, મહિન્દ્રા એન્ડ મહિન્દ્રા, હ્યુન્ડઈ જેવી અગ્રણી કંપનીઓનું વેચાણ જાન્યુઆરી મહિનામાં વધ્યું હતું. જીએસટીમાં ઘટાડા અને તહેવારોની સિઝનનું મોમેન્ટમ જાન્યુઆરીમાં પણ ચાલુ રહ્યું હતું.

મારુતિ સુઝુકીનું ડીલર્સને ડિસ્પેચ જાન્યુઆરીમાં વધીને 1,74,529 યુનિટ થયું હતું, જે ગત વર્ષે આ ગાળામાં 1,73,599 યુનિટ હતું. મિનિ સેગમેન્ટમાં અલ્ટો અને એસ-પ્રેસોનું વેચાણ સાધારણ વધીને 14,268 થયું હતું, જે ગત વર્ષે આ ગાળામાં 14,247 યુનિટ હતું. કોમ્પેક્ટ સેગમેન્ટમાં વેચાણ ઘટીને 72,738 યુનિટ થયું હતું, જે ગત વર્ષે આ ગાળામાં 82,241 યુનિટ હતું. યુટિલિટી સેગમેન્ટમાં વેચાણ વધીને 75,609 યુનિટ થયું હતું, જે ગત વર્ષે આ ગાળામાં 65,093 યુનિટ હતું.

મારુતિના સીનિયર એક્ઝિક્યુટિવ ઓફિસર (માર્કેટિંગ-સેલ્સ) પાર્થો બેનેરજીએ કહ્યું હતું કે કંપનીએ જાન્યુઆરીમાં અત્યાર સુધીનું સૌથી વધુ 2,36,963 યુનિટ વેચાણ કર્યું હતું. કંપનીને 2.78 લાખ યુનિટનું બુકિંગ મળ્યું હતું, જે 25 ટકા વૃદ્ધિ દર્શાવે છે. કંપનીએ નવી લોન્ચ કરેલી એસયુવી વિક્ટોરીસનું વેચાણ પાંચ મહિનામાં 50,000 યુનિટને પાર થઈ ગયું હોવાનું તેમણે કહ્યું હતું. ટાટા મોટર્સનું પેસેન્જર વ્હીકલનું ડિસ્પેચ 46 ટકા વધીને 70,222 યુનિટ થયું હતું, જે ગત વર્ષે આ ગાળામાં 48,076 યુનિટ હતું. મહિન્દ્રા એન્ડ મહિન્દ્રાનું ડિસ્પેચ 25 ટકા વધીને 63,510 યુનિટ થયું હતું, જે ગત વર્ષે આ ગાળામાં 50,659 યુનિટ હતું. હ્યુન્ડઈ મોટરનું ડિસ્પેચ 9 ટકા વધીને 59,107 યુનિટ થયું હતું, જે ગત વર્ષે આ ગાળામાં 54,003 યુનિટ હતું.