પેસેન્જર ટ્રાફિકમાં સતત વૃદ્ધિ અને મજબૂત માગને પગલે વિમાન ભાડાંમાં 25થી 40 ટકાનો વધારો

Published By : B.K.NEWS DAINIK
Published Date : 2023-03-09 17:29:40
Views : 491
Modified Date : 2023-03-09 17:29:40

આ વર્ષના પ્રથમ બે મહિનામાં ઍરલાઈન્સના પૅસેન્જરોનો ટ્રાફિક લગભગ કોરોના પહેલાંના સમય જેટલો થયો છે, પણ તેની સામે ઍરલાઈન્સની ક્ષમતામાં વધારો થયો ન હોવાથી ઍરલાઈન્સનાં ભાડાં વધી ગયાં છે અને નજીકના સમયમાં ઘટવાના નથી એવી ચેતવણી ઍરલાઈન્સે આપી છે. વિમાની સેવાઓની માગ કરતાં પુરવઠો ઓછો હોવાથી વધેલાં ભાડાં જ હવે સામાન્ય ગણાશે, એમ તેમણે કહ્યું છે.

જાન્યુઆરી અને ફેબ્રુઆરીમાં 2020ના કોરોનાકાળ કરતાં વિમાન ભાડાં લગભગ 25થી 40 ટકા વધ્યાં હતાં. કેટલાક લોકપ્રિય રૂટમાં તેના કરતાં પણ મોટો વધારો જોવાયો હતો. જોકે વિમાન ભાડાં વધવાં છતાં પૅસેન્જર ટ્રાફિકમાં કોઈ ફરક પડયો ન હતો.

2022માં કુલ 12.33 કરોડ મુસાફરોએ હવાઈ મુસાફરી કરી હતી જ્યારે કોરોના પહેલાંના 2019ના વર્ષમાં 14.41 કરોડ મુસાફરોએ હવાઈ મુસાફરી કરી હતી. આમ 2019 કરતાં 2022માં લગભગ 14.4 ટકા ઓછા મુસાફરો હતા.

જેકે આ વર્ષના જાન્યુઆરી-ફેબ્રુઆરીમાં આ ઘટ સંકડાઈને 3 ટકા થઈ ગઈ હતી. આ વર્ષના જાન્યુઆરી અને ફેબ્રુઆરીમાં 2.44 કરોડ લોકોએ હવાઈ મુસાફરી કરી હતી. જ્યારે 2020ના આ બે મહિનામાં 2.52 કરોડ મુસાફરોએ હવાઈ મુસાફરી કરી હતી, એમ નાગરિક ઉડ્ડયન મંત્રાલયના અહેવાલમાં જણાવ્યું હતું.

થોમસ કૂક (ઈન્ડિયા) અને એસઓટીસી ટ્રાવેલના પ્રમુખ ઈન્દીવર રસ્તોગીએ જણાવ્યું હતું કે કંપનીઓ અને પ્રવાસીઓની મજબૂત માગ, એટીએફના ભાવમાં વધારો અને ભાડાં પરની ટોચમર્યાદાની નાબૂદીને કારણે જાન્યુઆરી-ફેબ્રુઆરીમાં 2019ની સરખામણીમાં ઘણા રૂટ પરનાં ભાડાં 25-30 ટકા વધી ગયાં છે.

અત્યારે હવાઈ મુસાફરી કરવા માગતા પૅસેન્જરોની સંખ્યા વિમાની સેવાઓની ક્ષમતાના 85 ટકાથી વધુ છે અને તેની સામે વિમાનોની સંખ્યામાં ખાસ વધારો થયો નથી. વિમાની બળતણના ભાવ પણ ટકેલા છે. આ સંજોગોમાં ઍરલાઈન કંપનીઓ તકનો લાભ લઈને તેમનું માર્જિન વધારી રહી છે.

ઈન્ડિગો ઍરલાઈન્સના એક પ્રવક્તાએ જણાવ્યું હતું કે મજબૂત અને વધતી જતી માગને પહોંચી વળવા તેઓ પોતાની ક્ષમતા વધારી રહ્યા છે. હવાઈ ભાડાંમાં થયેલો વધારો જ્યાં સુધી માગ વધુ રહેશે ત્યાં સુધી ચાલુ રહેશે.

ભારતની ત્રીજા ક્રમની સૌથી મોટી ઍરલાઈન વિસ્તારાએ પણ વધતી જતી માગને પહોંચી વળવા માટે ક્ષમતા વધારી છે. કોવિડ પહેલાં વિસ્તારાની રોજની 200થી વધુ ફલાઈટ ચાલતી હતી. જે અત્યારે 275થી વધુ ફલાઈટ ચાલે છે, એમ વિસ્તારાના એક અધિકારીએ જણાવ્યું હતું. અલબત્ત, હજી સુધી ઍરઈન્ડિયા તરફથી કોઈ પ્રતિભાવ આવ્યો નથી.

ઈઝ માય ટ્રીપના અધ્યક્ષ નિશાંત પીટ્ટીએ જણાવ્યું હતું કે, ઍરલાઈન્સનાં ભાડાંની વધઘટ માટે ઘણાં કારણો જવાબદાર હોય છે. મુસાફરીનું સ્થળ અને તેનું અંતર, મુસાફરીની તારીખ, વિમાનમાં જગ્યાની ઉપલબ્ધિ વગેરે પરિબળોના આધારે વિમાન ભાડું નક્કી થતું હોય છે.